របៀបសរសេរសេចក្តីថ្លែងអំពីគោលបំណង (SOP) សម្រាប់​ពាក្យសុំ​សិក្សាជាអន្តរជាតិ

ណែនាំឱ្យរក្សាទម្រង់គំរូ ហើយខ្ញុំសូមណែនាំឱ្យប្រើវាសម្រាប់ឯកសារទាំងអស់របស់អ្នក។ ខ្ញុំផ្ទាល់ប្រើពុម្ពអក្សរ Times New Roman ទំហំ 12 គម្លាតបន្ទាត់ 1.5 និងបានតម្រូវរឹមនៅក្នុងឯកសាររបស់ខ្ញុំទាំងអស់។

វាជាការអនុវត្តល្អក្នុងការបង្កើតទម្រង់ជាជំហានដំបូង នៅពេលអ្នកចាប់ផ្តើមធ្វើការលើឯកសារ។ ភាពជាប់លាប់ក្នុងការប្រើពុម្ពអក្សរ និងទម្រង់លើឯកសាររបស់អ្នកទាំងអស់បង្ហាញថាអ្នកជាបុគ្គលដែលមានការរៀបចំ ហើយធានាថាអត្ថបទរបស់អ្នកមើលទៅស្អាត និងរចនាបានយ៉ាងល្អ។

ចំពោះរចនាសម្ព័ន្ធ សេចក្តីថ្លែងអំពីគោលបំណងអនុវត្តតាមទម្រង់​តែងសេចក្តី​ធម្មតា។ វាចាប់ផ្តើមជាមួយនឹងសេចក្ដីផ្ដើម បន្ទាប់មកមានកថាខណ្ឌខ្លីៗចំនួនបីឬបួន ដែលផ្តល់ការយល់ដឹងអំពីសវតារបស់អ្នក។

វាចាំបាច់ណាស់ក្នុងការរក្សាសេចក្តីថ្លែងអំពីគោលបំណងរបស់អ្នកឱ្យខ្លី និងជាប់ទាក់ទងគ្នា ដែលល្អបំផុតកំណត់ត្រឹមតែមួយទំព័រគត់ ឬយ៉ាងច្រើនបំផុតមួយទំព័រកន្លះ។ សូមចងចាំថា គណៈកម្មាធិការអនុញ្ញាតការចូលរៀនពិនិត្យមើលសំបុត្រជាច្រើនពី​សិស្សនិស្សិត​ជាច្រើននាក់ ហើយការដាក់បញ្ជូន​តែងសេចក្ដី​ដែលមានចំនួនបី ឬបួនទំព័រអាចរារាំង​ការអាន​ឱ្យបានហ្មត់ចត់។

នៅក្នុងទម្រង់ដែលបានផ្តល់ជូន មួយទំព័រមានពាក្យប្រហែលជា 400 ពាក្យ។ ដូច្នេះ ការធ្វើផែនការដោយប្រុងប្រយ័ត្នគឺមានសារៈសំខាន់ណាស់ក្នុងការបែងចែកកថាខណ្ឌឱ្យមានប្រសិទ្ធភាព និងគូសបញ្ជាក់ព័ត៌មានសំខាន់ៗ។

និយាយឱ្យត្រង់ទៅ សេចក្ដីផ្ដើមភាគច្រើន ច្រើនតែជាស្តាប់ទៅស្រដៀងគ្នា។ សិស្សនិស្សិត​ជាច្រើននាក់ចាប់ផ្តើម​តែងសេចក្តី​របស់ពួកគេជាមួយនឹងឃ្លាដូចជា 'ខ្ញុំកំពុងដាក់ពាក្យទៅ​កម្មវិធី​នេះពីព្រោះខ្ញុំស្រលាញ់...' ឬ 'ខ្ញុំកំពុងសរសេរដើម្បីបង្ហាញពីចំណាប់អារម្មណ៍របស់ខ្ញុំចំពោះរឿងនេះ។' ​ខណៈពេលដែលវាជាគំនិតល្អក្នុងការយោងទៅលើឧទាហរណ៍តាមអនឡាញសម្រាប់ការណែនាំ នោះវាជារឿងសំខាន់ដែលមិនត្រូវចម្លង-បិទភ្ជាប់ឧទាហរណ៍ទាំងនោះ!

ជំនួសឱ្យការសរសេរប្រយោគបើកដែលទូទៅ សូមព្យាយាមចាប់ផ្តើម​តែងសេចក្តី​របស់អ្នកជាមួយនឹងអ្វីដែលជាប្រភពដើម។ អ្នកអាចចាប់ផ្តើមជាមួយនឹងរឿងខ្លីមួយដែលនាំឱ្យអ្នកដាក់ពាក្យទៅសាកលវិទ្យាល័យនោះ ឬចែករំលែករឿងរ៉ាវផ្ទាល់ខ្លួនដែលពាក់ព័ន្ធ។ សូមចងចាំថាសេចក្ដីផ្ដើមគឺស្រដៀងគ្នាទៅនឹងចំណាប់អារម្មណ៍ពេលជួបដំបូង ដែលអ្នកចង់ទាក់ទាញចំណាប់អារម្មណ៍របស់អ្នកអាន។

ប្រសិនបើអ្នកកំពុងដាក់ពាក្យទៅសាកលវិទ្យាល័យជាច្រើន អ្នកមិនចាំបាច់បង្កើតរឿងរ៉ាវ និង​តែងសេចក្តី​ខុសគ្នាទាំងស្រុងចំនួនប្រាំនោះទេ។ ទោះជាយ៉ាងណាក៏ដោយ វាចាំបាច់ណាស់ក្នុងការមិនចម្លងតាម​តែងសេចក្តី​របស់អ្នកតាំងពីដើមដល់ចប់។

ជាងនេះទៅទៀត ជៀសវាងការប្រើឃ្លាទូទៅដូចជា 'ខ្ញុំពិតជារីករាយក្នុងការសិក្សានៅសាកលវិទ្យាល័យនេះ ហើយ​កម្មវិធី​នេះគឺល្អបំផុតនៅក្នុងពិភពលោក។' ផ្ទុយទៅវិញ សូមលើកយកឈ្មោះសាកលវិទ្យាល័យជាក់លាក់ និង​វគ្គសិក្សា​ជាក់លាក់របស់ពួកគេ។ ប្រសិនបើអាច សូមយោងទៅសាស្រ្តាចារ្យជាក់លាក់ដែលអ្នកចង់សហការជាមួយ។ បញ្ចូលព័ត៌មានលម្អិតឱ្យបានច្រើនតាមដែលអ្នកអាចធ្វើទៅបាន ដើម្បីបង្ហាញថាអ្នកបានធ្វើ​ការស្រាវជ្រាវ​យ៉ាងល្អិតល្អន់អំពី​វគ្គសិក្សា និងសាកលវិទ្យាល័យ។

កថាខណ្ឌទីពីររបស់អ្នកគួរតែស្វែងយល់ពីមូលហេតុដែលអ្នកចាប់អារម្មណ៍ក្នុងការបន្ត​វគ្គសិក្សា​ជាក់លាក់នេះ។ បន្ទាប់ពីបង្ហាញចំណាប់អារម្មណ៍ដំបូងរបស់អ្នកក្នុងសេចក្ដីផ្ដើមរួចហើយ សូមពន្យល់វាឱ្យលម្អិតបន្ថែមទៀត និងផ្តល់ហេតុផលច្បាស់លាស់សម្រាប់ការជ្រើសរើស​វគ្គសិក្សា​នេះ។

កថាខណ្ឌទីបីគួរតែរៀបរាប់ពីបទពិសោធន៍អតីតកាលរបស់អ្នកនៅក្នុង​មុខវិជ្ជា​នេះ។ រៀបរាប់ពីគម្រោងណាមួយដែលអ្នកបានធ្វើការ តែងសេចក្តី​ដែលពាក់ព័ន្ធនឹងការពិសោធន៍ ឬការចុះប្រមូលទិន្នន័យ ការវិភាគទិន្នន័យ ឬបទពិសោធន៍ពាក់ព័ន្ធណាមួយដែលមានទំនាក់ទំនងនឹង​វគ្គសិក្សា​ដែលអ្នកចង់សិក្សា។ អ្នកក៏អាចបញ្ជាក់ពីសាស្រ្តាចារ្យដែលអ្នកបានធ្វើការជាមួយ ឬបានបង្រៀនអ្នក ជាពិសេសប្រសិនបើពួកគាត់មានវិជ្ជាជិវៈក្នុង​មុខវិជ្ជា​នេះ។

សូមភ្ជាប់កថាខណ្ឌទីពីរ និងទីបីដោយសេរី។ អ្នកអាចសរសេរវាជាកថាខណ្ឌតែមួយ ឬប្តូរលំដាប់របស់វាបាន។ ជម្រើសនៃរបៀបរៀបចំកថាខណ្ឌទាំងពីរនេះគឺមិនសំខាន់ប៉ុន្មានទេ ហើយវាអាចទទួលយកបានទាំងស្រុងក្នុងការភ្ជាប់នូវមូលហេតុដែលអ្នកចង់បន្ត​វគ្គសិក្សា​ជាមួយនឹងអ្វីដែលអ្នកសម្រេចបានពីមុន។

កថាខណ្ឌទីបួន ដែលជាកថាខណ្ឌបញ្ចប់ គួរបញ្ជាក់ឱ្យបានច្បាស់អំពីសេចក្តីប្រាថ្នានាពេលអនាគតរបស់អ្នក រួមទាំងផែនការ និងក្តីសុបិន្តរបស់អ្នក។ នៅត្រង់ចំណុចនេះ សូមផ្ដោតលើភាពជាក់លាក់ ដោយជៀសវាងសេចក្តីថ្លែងទូទៅខ្លាំងដូចជា 'ខ្ញុំចង់ធ្វើការនៅមន្ទីរពេទ្យ'។ ផ្ទុយទៅវិញ សូមផ្តល់ព័ត៌មានលម្អិតបន្ថែមទៀត ដូចជាទីកន្លែង មូលហេតុ និងរបៀបដែល​វគ្គសិក្សា​នេះនឹងជួយដល់ដំណើររបស់អ្នក។

សម្រាប់មនុស្សជាច្រើន ទិដ្ឋភាពដ៏លំបាកបំផុតគឺការពិភាក្សាអំពីភាពជោគជ័យ សមិទ្ធិផល សេចក្តីប្រាថ្នា និងផែនការ​អាជីព ដោយមិនឱ្យស្ដាប់ទៅដូចជាអួតអាងនោះទេ។ វាអាចពិបាកក្នុងការធ្វើឱ្យមានតុល្យភាពនៃការបង្ហាញពីភាពខ្លាំង និងគុណធម៌របស់អ្នកជាមួយនឹងភាពថ្លៃថ្នូរ។

ប្រសិនបើអ្នកនៅសល់ចន្លោះទំនេរមួយចំនួន ហើយអាស្រ័យលើ​​កម្មវិធី​ដែលអ្នកកំពុងដាក់ពាក្យសុំ អ្នកអាចរៀបរាប់ពីសកម្មភាពក្រៅកម្មវិធីសិក្សាដែលទាក់ទងនឹង​វគ្គសិក្សា ឬគូសបញ្ជាក់ពី​ជំនាញ​របស់អ្នកតាមមធ្យោបាយណាមួយ។ ទោះជាយ៉ាងណាក៏ដោយ ចូរប្រុងប្រយ័ត្នក្នុងការជ្រើសរើស​ជំនាញ​ណាមួយដែលត្រូវគូសបញ្ជាក់។ ឧទាហរណ៍ ការលេងព្យាណូអាចមានប្រយោជន៍ ប្រសិនបើអ្នកប្រាថ្នាចង់ក្លាយជា​គ្រូបង្រៀន ប៉ុន្តែមិនសូវពាក់ព័ន្ធនោះទេ ប្រសិនបើគោលដៅរបស់អ្នកគឺចង់ក្លាយជាអ្នកបើកបរយន្តហោះ។

ទម្រង់អតីតកាល-បច្ចុប្បន្នកាល-អនាគតកាលអាចត្រូវបានប្រើប្រាស់សម្រាប់រៀបចំរចនាសម្ព័ន្ធសេចក្តីថ្លែងអំពីគោលបំណងរបស់អ្នក។ អ្នកចាប់ផ្តើមដោយការពិពណ៌នាអំពីបទពិសោធន៍ពីមុនរបស់អ្នក បន្ទាប់មកពន្យល់ថាតើអ្នកសាកសមនឹង​កម្មវិធី​នេះកម្រិតណា ហើយជាចុងក្រោយ ចូររៀបរាប់ពីរបៀបដែលអ្នករំពឹងថានឹងទទួលបានអត្ថប្រយោជន៍ពី​កម្មវិធី​នាពេលអនាគត។

របៀបនៃ​ការសរសេរ​ដែលអ្នកប្រើមានសារៈសំខាន់យ៉ាងខ្លាំង។ អ្នកប្រើពាក្យប្រហែលជា 400-500 ពាក្យដើម្បីបញ្ចុះបញ្ចូលនរណាម្នាក់ថាអ្នកជាបេក្ខជនដ៏ល្អឥតខ្ចោះម្នាក់ ហើយថាអ្នកមាន​ជំនាញសរសេរ​ដែលចាំបាច់សម្រាប់ការអប់រំនាពេលអនាគតរបស់អ្នក។

ការរក្សាតុល្យភាពគឺជារឿងសំខាន់។ អ្នក​មិន​អាច​សរសេរ​ក្នុង​លក្ខណៈ​នៃ​ការសន្ទនា​ដោយ​រួសរាយ​រាក់ទាក់​បាន​ទេ​ពីព្រោះ​អ្នកអានរបស់​អ្នក​គឺ​ជា​គណៈកម្មាធិការអនុញ្ញាតការ​ចូល​រៀន ដែល​អាច​រួម​មានទាំង​សាស្ត្រាចារ្យ​ដ៏​មាន​សក្ដានុពល​របស់​អ្នកផងដែរ។ ទោះជាយ៉ាងណាក៏ដោយ អ្នកក៏មិនចង់ឱ្យគេមើលមកថាផ្លូវការហួសហេតុពេកដែរ ព្រោះវាអាចបញ្ជាក់ពីការខ្វះចំណាប់អារម្មណ៍ពិតប្រាកដ។

ខិតខំស្វែងរកចំណុចកណ្តាល។ ប្រើរបៀបផ្ទាល់ខ្លួននៅក្នុងផ្នែកមួយនៃ​តែងសេចក្តី ដើម្បីបង្ហាញពីមនុស្សជាតិរបស់អ្នក និងភាពខ្នះខ្នែងរបស់អ្នកដើម្បីទទួលបានការអនុញ្ញាតឱ្យចូលរៀនក្នុង​វគ្គសិក្សា។ ក្នុងពេលដំណាលគ្នានេះ ប្រកាន់ខ្ជាប់នូវ​ការសរសេរ​ដ៏រឹងមាំ ច្បាស់លាស់ និងសង្ខេប។ ប្រកាន់យកនូវសូរសៀងវិជ្ជមាន និងមានទំនុកចិត្ត ខណៈពេលដែលជៀសវាងពាក្យដដែលៗ និងភាសាធម្មតា។

ជាចុងក្រោយ សូមឧស្សាហ៍ពិនិត្យមើលកំហុសអក្ខរាវិរុទ្ធ និងវេយ្យាករណ៍។ នៅពេលដាក់ពាក្យចូលរៀនក្នុង​វគ្គសិក្សា​ អ្នកត្រូវតែបង្ហាញពី​សមត្ថភាព​ជំនាញភាសាអង់គ្លេសរបស់អ្នក ដែលជារឿងសំខាន់ខ្លាំងបំផុតក្នុងការសិក្សារបស់អ្នក។ សេចក្តីថ្លែងអំពីគោលបំណងដើរតួជាវេទិកាដ៏ល្អឥតខ្ចោះមួយដើម្បីបង្ហាញពី​ជំនាញ និង​ចំណេះដឹង​ភាសារបស់អ្នក។

បន្ទាប់ពីបញ្ចប់សេចក្តីព្រាងដំបូងរបស់អ្នក សូមទុកវាចោលពីរបីថ្ងៃ។ នៅពេលត្រឡប់មកវិញ សូមកែសម្រួល កែសម្រួលឡើងវិញ ហើយអានផ្ទៀងផ្ទាត់វា។ វាអាចនឹងហត់នឿយក្នុងការសរសេរ​​តែងសេចក្ដី​​មួយចប់ ហើយការសម្រាកអនុញ្ញាតឱ្យអ្នករកឃើញពាក្យដែលប្រើច្រើនដងដូចជា 'អស្ចារ្យ' ឬ 'ខ្លាំងណាស់'។ នេះជារឿងធម្មតាទេ ដែលនេះជាមូលហេតុដែលគួរឱ្យអ្នកផ្សេងអានវា ឬពិនិត្យមើលឡើងវិញដោយខ្លួនឯងបន្ទាប់ពីរយៈពេលពីរបីថ្ងៃ។

សូមមើលឧទាហរណ៍មួយចំនួននៅលើអនឡាញសម្រាប់ការបំផុសគំនិត។ ស្រង់ចេញនូវគំនិត និងពាក្យគន្លឹះដែលអាចជួយអ្នកក្នុងការកែលម្អសេចក្តីថ្លែងអំពីគោលបំណងរបស់អ្នក។ ទោះយ៉ាងណាក៏ដោយ សូមព្យាយាមរក្សាគំនិតច្នៃប្រឌិត។ នៅពេលពិនិត្យមើលឧទាហរណ៍លើអនឡាញ សូមចាំថាយកលំនាំតាមរចនាសម្ព័ន្ធជាជាងខ្លឹមសារ។ សូមសំណាងល្អ!